الحوار مع المراهق محتاجين نبقى ماهلين نفسيا
فرنسا يوسف غازى الشناوى | France Youssf Ghazy Elshenawy
17/12/2023 القراءات: 115
الحوار مع المراهق
محتاجين نبقي مأهلين نفسنا لشوية حاجات
📌أولها ...أني لو مش عامل معاه رصيد في نقطة الحوار من مرحلة الطفولة ف دا هيستلزم مني مجهود أكبر وصبر أكتر عشان أعوض الوقت اللي راح ( ما أكونش معوده من صغره علي لهجة الأوامر والصريخ والزعيق واني مش فاضي للنقاش ، واني مشغول عشان أوفر لهم طلباتهم ، ولما أقول كلمة تتنفذ .......وغيرها من العراقيل بيني وبينه في سكة الحوار وأبقي متوقع اني اول ما أبدأ أغير طريقتي وأجذبه للحوار معايا إن كل اللي فات هيتغير في غمضة عين )
📌حتي لو محاولاتي في البداية أتواجهت بالصد والرفض من ناحيته صبري واستمراري في السعي للتقرب منه كفيلة انها تلين جانبه المهم إني ......أستمر ..و...أصبر
وأبقي متيقن أني طول ما بحاول هقدر أوصل ل لغة ومساحة مشتركة بيننا
⬅️⬅️أساسيات حواري مع أبني أو بنتي المراهقين لازم تشتمل علي النقاط التالية ؛
١-إقرار المشاعر ؛ بمعني حتي لو برفض له طلب أو بوجهله نصيحة مش علي هواه أبقي مستوعب مشاعره في الرفض أو الإحباط وغيرهم ما أستنكرش المشاعر دي وأحول دفة الخلاف ان ليه ترفض وليه تزعل (بيكون كلامي معاه انه انا متفهم ضيقك أو زعلك دلوقتي بس لازم تستوعب ان غرضي الأساسي مصلحتك ولما الأمور تهدأ ممكن نتناقش تاني ونحاول نقنع بعض....كدا خليت مساحة لاعادة النقاش و وصلتله فكرة اني مش متعسف لمجرد أني الطرف الأقوي في العلاقة )
٢-تقبل تغيرات المزاج أو المود اللي بيمروا بيها ( mood changes) لأنها من الخصائص المميزة لمرحلتهم نتيجة التغيرات الهرمونية اللي بيمروا بيها أو التحديات اللي بيواجهوها......وما انتقدهمش علي دا بالعكس ابقي مفهمهم ان دا طبيعي في مرحلتهم بس يواجهوه بطرق مختلفة سواء تفريغ المشاعر ب كتابة المذكرات أو الفضفضة أو الأنشطة المختلفة
٣-تصدير ثقافة الاعتذار ليهم.......بمعني لو صادف في موقف وانفعلت عليهم بشكل مبالغ مش عيب أني اعتذر وابرر مبالغتي للموقف وفي نفس الوقت بكون قدوة ليهم في دا وأسهل عليهم انهم يعملوه في مواقف مماثلة
٤-يكون عندي مهارة التغافل في بعض المواقف .....بالبلدي كدا ما أقفش معاه عالواحدة .....بمعني في أمور ممكن أعديها وأمور تانية أكون ما أقبلش التهاون فيها لكن يبقي عندي من الحكمة والقدرة علي التفريق بين المواقف اللي تحتمل التغافل وغيرها لأ........علي سبيل المثال اهمالهم في مظهرهم أو قصات الشعر الغريبة أو اتباعهم لتريندات معينة انا شايفها تافهة أو سخيفة كل دي أمور ممكن التغافل عنها في مقابل أني أكون حازم وحاسم في أمور تانية زي اداء العبادات ،رفاق السوء أو تصرفات أخلاقية مشينة
٥-أكون حريص علي مساحة الحوار وإشراكه في أمور أو مسئوليات معينة يحس فيها بأهميته،وياريت لو ناخد رأيه في أمور تخصنا أو حكايات بخصوص الشغل وأسمع له وأمدح مشاركته واراؤه
وأخيرا................لازم نكون متيقنين ان مجهودنا في التقرب ليهم كفيل بإزالة أي رواسب أو آثار سيئة من الطفولة
وكل ما زاد إخلاصي في السعي والمجهود دا ......هحصد ثماره معاهم
❤️وإن اللي بنبذله من مجهود وصبر وطاقة هوا حجر الأساس في تحديد هويتهم وتكوين شخصياتهم علي المدي البعيد
الحوار مع المراهق محتاجين نبقى ماهلين نفسيا
يجب تسجيل الدخول للمشاركة في اثراء الموضوع
مواضيع لنفس المؤلف
مواضيع ذات صلة