التربية عملية شاقة للغاية ومجهدة
فرنسا يوسف غازى الشناوى | France Youssf Ghazy Elshenawy
18/10/2024 القراءات: 79
حقيقي التربية عملية شاقة مجهدة ،وممكن نقول كمان أنها عملية معقدة، لكن الحقيقة واللي الدراسة أثبتته هي أنه لها مفتاح، والمفتاح ده مش موجود في النظريات المعقدة ولا القوانين الصارمة ولاأي وصفات مجهدة، المفتاح السحري للتربية هو ببساطة في مشاعر الحب والحنان الفطري اللي بتربطنا بولادنا ، واللي ساعات من كتر الحب ما بنظهرهاش لولادنا ، اللي بيظهر لهم الزعيق والشخط والنطر.
لكن لو المشاعر دي بنظهرها لهم في تعاطفنا معاهم وتفهمنا للمشاعر اللي بيمروا بها . الأمر فعلا هيكون مختلف ..
التربية الناجحة تبدأ في قلبك ، وبعدين تستمر في كل موقف وفي كل لحظة تكون مشاعر أولادنا فيها عالية وقوية ،أكبر قدرة على التأثير وبناء العلاقة لما يشعروا بالغضب ،بالحزن، بالخوف...بالتوتر ، بالاحباط ،بالألم ويلاقوك جنبهم مش بتقلل من شأن أي شعور ولا بتتجاهله، ولا بتلوم عليه ولا بتنكره...
بتحاول تفهم الشعور مهما كان..وتقدره ...وتساعد ابنك يتعامل مع الشعور...
قلب التربية يكمن في حضورك في لحظات المشاعر القوية بقلبك وتعاطفك وتفهمك واحتوائك .. اللحظات دي هي جوهر التربية اللي بتساعد على تنشئة أبناء عندهم قدرة على التعامل مع الحياة بشكل أفضل.
والأبحاث أكدت أن الأبناء اللي بيتم التعامل مع مشاعرهم بالطريقة دي
1- حققوا درجات أعلى في الحساب والقراءة عن الأطفال اللي أهلهم بيتجاهلوا مشاعرهم رغم تساويهم في مستوى الذكاء.
2-عندهم قدرة على التهدئة الذاتية بسرعة وسهولة أكبر لما يكونوا منزعجين. وقدرة أكبر على التحكم في الاندفاعية.
3-قدرة أكبر على مقاومة الأمراض المعدية .
4-درجة تركيزهم أعلى.
5- يقدروا يصبروا وينتظروا عالحاجة اللي عايزينها.
6- قدرة أفضل على تحفيز نفسهم .
7- قدرة أفضل على التعامل مع الحياة عموما بصعودها وهبوطها وحلوها ومرها.
8- يحتاجوا مجهود أقل في التهذيب عموماً
9- علاقات أفضل بزملائهم.
المرجع
Raising An Emotionally Intelligent Child
John Gottman
التربية عملية شاقة للغاية ومجهدة
يجب تسجيل الدخول للمشاركة في اثراء الموضوع
مواضيع لنفس المؤلف
مواضيع ذات صلة