رواندا .... سنغافورة افريقيا
الأستاذ الدكتور هشام فخر الدين | Prof.Dr.hesham fkhreldeen
11/01/2023 القراءات: 636
تبدأ الحكاية سنة 1884 لما احتلت ألمانيا رواندا ومن بعدها احتلتها بلجيكا سنة 1916 ..
الدولتين علشان يحكموا السيطرة كان لازم يعملوا اختلافات ونزاعات داخلية بينهم فعملوا ايه؟ ..
رواندا وقتها كانت مقسمة لقبيلتين .. واحدة اسمها "الهوتو" واللي تمثل 80% من الشعب وقبيلة "التوتسي" واللي تمثل 20% من الشعب .. والاتنين على بعض ميكملوش 10 مليون مواطن
فالاحتلال استعبد الهوتو كمزارعين وأعطى قبيلة التوتسي مهنة الرعي .. ووصف قبيلة التوتسي بـ"العرق الأنقى" ..
وفي 1931 فرض الاحتلال ادخال اسم قبيلة الشخص في بطاقة التعريف الوطنية .. وبناءاً عليه أعطى قبيلة التوتسي مميزات حرم منها قبيلة الهوتو ..
وفي سنة 1962 أخيراً استقلت رواندا من الاستعمار وتركت وراها عداوة بين القبيلتين ..
لما خرج الاستعمار من رواندا قبيلة الهوتو لقت فرصة في انها تنتقم من قبيلة التوتسي .. واعتبروهم مواطنين أصلهم غير رواندي وانهم عملاء وخونة للاحتلال ..
ودارت بينهم نزاعات لحد ما وصلت لذروتها سنة 1991 .. وقتها قبيلة التوتسي غزت رواندا لحد ما وصلت للعاصمة "كيجالي" وهنا تدخلت الأمم المتحدة وعملت اتفاقية سلام عرفت بـ"اتفاقية أوشا" ..
لكن رئيس الهوتو رفض الاتفاقية وسلح قبيلة الهوتو .. وبسبب رفضه للاتفاقية تم اسقاط طيارته سنة 1994 .. وزي ما تقول ده عود الكبريت اللي وقع على بنزين ..
بعد اسقاط طيارة رئيس الهوتو انتشر مسلحين قبيلة الهوتو في الشوارع وكانوا بيقـ ـتـ ـلوا اي حد يلاقوه من قبيلة التوتسي ..
وعلى مدار 100 يوم اتقـ ـتل أكتر من مليون مواطن رواندي اغلبهم من قبيلة التوتسي .. يعني 10% من الشعب ماتوا .. انت متخيل !! .. وتم اغتـ ـصـ ـاب نص مليون امرأة رواندية وانتاج أطفال ملهمش آباء !!
مما دفع رئيس البلاد "باستور بيزيمونجو" للإستقالة سنة 2000 .. وقتها قدرت قبيلة التوتسي انها تسيطر على العاصمة "كيجالي" وتولى رئيس قبيلة التوتسي "بولكا جامي" حكم البلاد ..
وهنا بتبدأ عصر النهضة الرواندية العظيمة ..
عمل ايه بقا بولكا جامي في بلد خارجة من حرب أهلية؟!
أدرك ان التفرقة بين المواطن المنتمي لقبيلة التوتسي والمواطن المنتمي لقبيلة الهوتو هيا السبب في الدمار اللي بيحصل ..
فلغى التصنيف بين المواطنين .. وخلى كل شخص في البلد اسمه مواطن رواندي فقط ..
وأسس هيئة اسمها "هيئة الوحدة والمصالحة" وضمت أكتر 1200 محكمة لمحاكمة المواطنين لكن مش علشان يعاقبوهم .. علشان يخلوهم يعترفوا بالذنب ويخلوهم يكفروا الذنب بخدمة المجتمع .. وفرض برامج تأهيل للمتسببين في الحرب الأهلية لإعادة تأهيلهم علشان يرجعوا يعيشوا مرة تانية وسط الشعب ..
وأعاد تقسيم المحافظات مرة تانية علشان يلغي فكرة القبيلة .. وعمل قوانين صارمة تعد كل من يتكلم بالخطاب العنـ ـصري مجـ ـرم ..
وفرض مقررات دراسية في المدارس تشرح أسباب قيام الحرب الأهلية علشان الأجيال القادمة تعرف ايه سبب دمار بلادهم فيكرهوا الاسباب دي ..
وبعت خبراء اقتصاديين من بلاده للبلاد اللي حققت نهضة اقتصادية علشان ينقلوا خبراتهم لرواندا ..
واهتم بالتعليم جداً .. وحول نظام تقييم المدرسين من الأقدمية لمعيار نسبة النجاح .. يعني المدرس اللي طلابه يكونوا ناجحين هو يكون له الأفضلية ..
وزودوا ميزانية التعليم .. ومع كل سنة بتزيد الميزانية تبعاً للدخل القومي للبلد .. واهتم جداً بمرحلة الابتدائي لانها بتمثل نشأة الطفل .. وتطورت رواندا تعليمياً لدرجة انها اطلقت قمر صناعي خاص بالاتصالات علشان يوفر خدمات الانترنت لمدارس رواندا ..
وفي الزراعة استغل الشعب الرواندي الزراعة ووفر فرص عمل للناجين من الحرب الأهلية ونجح جداً فيها خصوصاً في زراعة البن والشاي .. وشكلوا أساس الاقتصاد الرواندي .. وارتفع انتاج البن من 35 ألف طن لـ15 مليون طن ..
وفي المجال الطبي أصبحت رواندا بتستخدم الطيارات بدون طيار لنقل الدم لانقاذ المصابين في المناطق النائية لرواندا ..
وفي مجال السياحة تعاقدوا مع أرسنال وباريس وكتبوا تشيرتاتهم "Visit Rwanda" .. وطوروا السياحة الطبيعية بشكل كبير .. لحد ما وصل عدد السياح لمليون سائح سنوياً وأصبحت تاني أكبر مصدر للدخل في البلد ..
وحددت الحكومة يوم السبت في الاسبوع علشان الناس من كل الطبقات تنزل تنضف الشوارع .. لحد ما أصبحت العاصمة "كيجالي" انضف عاصمة أفريقية ..
وزاد دخل الفرد بشكل كبير جداً .. والحكومة قالت ان لو استمر خط سير الاصلاح ده المواطن الرواندي هيبقى من بين أعلى معدلات الدخل سنة 2050 ..
وعدلوا قوانين الاستثمار لحد ما بقت رواندا من الدول الجاذبة للمستثمرين ..
ودي كانت قصة نهضة رواندا من دولة مات 10% من سكانها في حرب أهلية لدولة بتلقب النهاردة بـ"سنغافورة أفريقيا" ..
رواندا - التنمية - التقدم
يجب تسجيل الدخول للمشاركة في اثراء الموضوع