البنت اللي مخدتش حب وقبول من أهلها
فرنسا يوسف غازى الشناوى | France Youssf Ghazy Elshenawy
14/03/2024 القراءات: 471
البنت اللي مخدتش حب وقبول من أهلها بالذات باباها، هتكبر وتكون سهل جدا تتشد لأي علاقة سامة
بتكون صورتها عن الحب والاهتمام غلط، وفاكرة إن ده شكل الحب
وهتتشد لأي إنسان مؤذي هيهتم بيها يوم ويهملها عشرة، هيقولها كلمتين حلوين وعشرين كلمة نقد ولوم وتقليل وتجريح
وطبعا هي فاقدة الثقة في نفسها فبتصدق كل كلامه، مش كدة وبس، هي كمان بتحس ان هو كتير عليها وكتر خيره انه مكمل معاها
وطبعا هي عايشة كل الأيام الوحشة على أمل اليوم الحلو يتكرر تاني
للأسف هي كبرت وهي عندها فكرة مشوهة عن الحب والاهتمام، وفاقدة الثقة في نفسها، ومقتنعة انها متستحقش أكتر من كدة، فبتقبل بأي وضع وأي معاملة
البنت لما بتاخد حب واهتمام وقبول ومدح ودعم من أهله، ا خاصة الأب صعب انها تتشد لعلاقة مؤذية، لأنها واثقة في نفسها، ومبتقبلش بأقل من اللي تستحقه
وواخدة حب واهتمام حقيقي، فتقدر تميز الحقيقي من المزيف
وأصلا الإنسان المؤذي بيخاف منها ويعملها ألف حساب، وألف خطة عشان يقرب منها
وهي ساعات بتتشد ليه في حالات قليلة بس بعد فترة بتفوق وتعرف ان العلاقة دي مؤذية وأنها تستاهل تكون مع حد أحسن من كدة
خلي بالك لو مخدتيش حب واهتمام ومدح من أهلك بالذات الأب وانتي صغيرة انتي معرضة انك تجذبي زوج يعاملك نفس معاملة أهلك، ويهملك وينتقدك
لازم تعرفي مواصفات العلاقة الصحية والمواصفات الصح للزوج، ولازم تزودي ثقتك بنفسك، وتعرفي انك تستاهلي حد يحبك ويهتم بيكي ويقدرك ويشوف الحلو فيكي
حبوا بناتكم وامدحوهم واحضنوهم واسمعوهم
البنت اللي مخدتش حب وقبول من أهلها