اسمح لأطفالك بالفشل نصيحة للاباء
فرنسا يوسف غازى الشناوى | France Youssf Ghazy Elshenawy
25/10/2024 القراءات: 231
نصيحة: اسمح لأطفالك بالفشل!
كلنا نحب أطفالنا وعايزين لهم أحسن حاجة، لكن محبتنا الزايدة ممكن تضرهم بدل ما تفيدهم.
- هل بتساعد ابنك في كل حاجة عشان تحميه من الفشل؟
- هل بتحل له مشاكله عشان مايتعبش؟
- هل بتساعده في اختيار له كل حاجة عشان تضمن الأفضل؟
لو الإجابة نعم، يبقى محتاج تراجع نفسك!
الدراسات بتسمي النوع ده من التربية اسم ظريف، هو "الأبوين الباراشوت"، يعني اللي بينزلوا على حياة الطفل في أي لحظة عشان يساعدوه. العلماء اكتشفوا إن التدخل الزايد ده بيأثر على صحة الطفل النفسية بشكل كبير. بيزود القلق والاكتئاب، وبيخلي الطفل مش راضي عن حياته ومش قادر يدير مشاعره.
ليه كل ده بيحصل؟
لأن التدخل الكتير بيمنع الطفل من تعلم مهارات أساسية زي الاعتماد على النفس، اتخاذ القرارات، والمبادرة. لو ما اديتهوش فرصة يجرب ويغلط ويتعلم من غلطاته، مش هيعرف يتصرف لما يكبر. لأنه ماتعودش هو اللي يسوق حياته!
أي حد ناجح مر بعثرات وفشل قبل ما يوصل. الفشل جزء من التعلم، واللي ما مرش بالتجربة دي، هيخاف يغلط أساسا.. هايخاف يخوض التجربة.. الفشل هايوجهع اكتر من أي شخص عادي لأنه ماتعود عليه.. هيكون قلقان ومتردد لأنه ماتعلمش ازاي يواجه التحديات بنفسه.
عشان كده اسأل نفسك: هل بتدي طفلك فرصة يغلط عشان يتعلم؟
اسمح لأطفالك بالفشل
يجب تسجيل الدخول للمشاركة في اثراء الموضوع