ازاى أخلى ابن متفوق نفسياً ودرسيا
فرنسا يوسف غازى الشناوى | France Youssf Ghazy Elshenawy
20/03/2023 القراءات: 439
ازاي أخلي إبني متفوق نفسياً
طبعا ده حلم غالبية الآباء والأمهات … بس إزاي ؟؟
١- اللوم والنقد :
بلاش طريقه اللوم والنقد الكتير اللي بتخليه يتبلد ويسمع النقد من ودن ويطلعه من الودن التانية… ولو عايزين تنقلوا خبراتكم
وتجاربكم لولادكم … إنقلوها من غير نقد وده ياخدنا للنقطة التانيه
٢- الزعيق والإهانة :
لو إتعودوا عالزعيق والإهانه جوه البيت حيحصل إنهم حيتقبلوها من أي حد بره البيت فمش كل حاجه تيجي بالزعيق ومش معني إنكم صح أو عندكم حق في نصيحتكم أو مضغوطين في حياتكم انكم تطلعوه علي ولادكم بالزعيق اللي ساعات بيبقي لأتفه الأسباب
٣- زرع الثقة بالنفس:
ودي بتبدأ من أول المراحل العمرية لما الطفل يقع من إيده حاجه أو يكسر حاجه أو يتكب منه حاجه كان بيستقبل منكم إيه ساعتها ؟ المفروض يلاقي رد فعل هادي وتعليمي وإزاي حننضف ده سوا ونعلمه براحه يعمل إيه علشان الخطأ ده ميتكررش والطريقة دي حتخلي عنده ثقه في نفسه وفي اللي حواليه … قصد كلامي مقابله الخطأ بهدوء وليس بالتعنيف.
٤- شبعان حُب :
لابد يكون حاسس إنه محبوب من أهل البيت وإنكم محظوظين بوجوده ودايما يتقاله كلمات الثناء والحب ومفيش مشكله لو يتحضن ولو مش بيحب الأحضان ممكن الطبطبة عالكتف مع الشعور إنك فعلآ فخور بيه
٥- الإعتماد علي النفس :
ودي من أهم النقط انه يعتمد علي نفسه ويكون مسؤول من نفسه … خليه ياخد الفرصة إنه يعمل حاجته بنفسه يجرب ويغلط ويجرب ويغلط ميجراش حاجة.
٦ - يتعلم يقول رأيه ...ويتعلم إمتي يقول لأ :
ودي محتاجة يكون عايش في بيئة آمنة وهي البيت، علشان بعدها حيتعلم يعمل كده برة البيت لما يبتدي يواجه المجتمع لوحده .
النقط اللي فاتت دي حتساعد ولادنا يبقوا متزنين نفسياً
ازاى أخلى ابن متفوق نفسياً ودرسيا
يجب تسجيل الدخول للمشاركة في اثراء الموضوع